ZAIDI YA BILIONI MBILI ZAPANUA MIRADI BUKABWA NA KUWATAMANISHA WANANCHI......

  

Diwani wa kata ya Bukabwa Mh Jonas Maswi Mwita amethibitisha kupokelewa kwa pesa za Kitanzania Sh Bilioni Mbili, Milioni Mia Sita Ishirini na Tatu, Laki Nane Sitini na Tano Elfu, Mia Tisa Hamsini na Tano,(2,623,865,955/=) katika kipindi cha miaka mitatu 2021-2023 Iliyogawanywa katika sekta zote zinazoguza maisha ya wananchi Afya,Elimu,Maji,Barabara na Mifugo ili kukamilisha,kufanya ukarabati na kuanzisha miradi mipya ndani ya kata hiyo.

Mh  Maswi  ameyasema hayo  katika hafla fupi iliyoandaliwa na Baraza la wazee wa Kata ya Bukabwa iliyohudhuriwa na viongozi wa chama ngazi ya Wilaya, Kata wakiwemo na  viongozi wa Serikali ngazi ya kata na  Wananchi wa Kata hiyo na maeneneo jirani, yenye lengo la kutoa pongezi kwa Chama na Serikali kwa namna wanavyojitahidi kuzitatua changamoto zilizokuwa na zinawakabili katika jamii.

 "Mimi  Diwani wa kata hii ya Bukabwa napenda kutoa pongezi na shukrani za dhati kwa Mbunge wetu kwa namna tunavyoshirikiana kwa karibu na pindi ninapomuwasilishia pungufu au hitaji katika kata yetu, amekuwa haweki vikwazo ni mfutiliaji  kama inavyotakiwa anaouweza na uzoefu uwasilishaji wa mapungufu tuliyonayo katika Serikali kuu na zaidi shukrani za dhati kwa Mh Rais  na Mwenyekiti wa Chama chetu pendwa cha mapinduzi Dr Samia Suluhu Hassan kwa kuzipokea changamoto zetu kupitia kwa Mbunge wetu na kutushushia Pesa nyingi kama hizo kwa kipindi kifupi haijawahi kutokea na  zinazotusaidia kuendelea kukamilisha miradi kufanya ukarabati na kuanzisha miradi mipya tunayoitekeleza ndani ya kata yetu." amesema Diwani Maswi.

Aidha Maswi amesema changamoto ya bwawa la maji ya mifugo Bukabwa lilikuwa ni kitendawili,

 ''Nilipambana sana kwa kipindi kilichopita kuweza kutatua changamoto ya bwawa la maji ya mifugo ila ilikuwa imekuwa ni kitendawili, nashukuru kwa kipindi hiki kupitia uzoefu wa Mbunge wetu tumepata Pesa kutoka Wizara ya mifugo Bwawa limekamilishwa na tumeweka  miundombinu rafiki na ya kisasa kwa ajili ya kutibu mifugo yetu kama Ng'ombe, Mbuzi na Kondoo,mradi uliogharimu zaidi ya Sh Milioni Mia nane na Themanini (882,000,000/=) hivyo tunayoimani kubwa wananchi wataongeza mapato kupitia mifugo yao kwa kuuza maziwa na ufugaji utaongezeka zaidi kwani wengi wao walikuwa wanachukia ufugaji kutokana na changamoto ya maji."

Akisindikiza ujumbe huo maususi wa utekelezaji wa ilani ya Chama cha Mapinduzi Mwenyekiti wa Chama cha Mapinduzi Wilaya ya Butiama Marwa Siagi, amewatoa hofu wananchi wa kata hiyo na Wilaya Butiama kwa ujumla kupuuza mambo ya mitandaoni yanayoenezwa na baadhi ya watu kwa masilahi yao binafsi, na badala yake wawe na imani na chama na wawatumie wawakilishi wao vyema ili kuzidi kusogeza kurudumu la maendeleo mbele kwani Chama kiko kazini kutekeleza Ilani yake.

Pamoja na hayo Mbunge wa Jimbo la Butiama Jumanne Sagini ambae pia ni Naibu Waziri wa Mambo ya Ndani, alihitimisha kwa kuwataka  wananchi kuendelea kuwa na Imani na Serikali inayoongozwa na Rais Samia Suluhu Hassan kwani itaendelea kutekeleza mengi kwa muda uliosalia kabla ya uchaguzi na kuwaomba wanachi  kuendelea kuwakumbusha kwa utulivu pale ambapo bado hapajakamilika na kusema.

 "Kadiri huduma za kijamii zinavyozidi kutekelezwa ndivyo wananchi wanavyozidi kutamani, ukitekaleza Kata A Kata B pia wanawiwa na wao kutekelezewa hivyo ni vyema kuwa na subira Pesa zinatafutwa na zinatolewa kila kata na Wilaya ndani Nchi yetu tuweni watulivu tuzidi kufanya kazi kwa ajili ya kuimarisha uchumi wa Taifa letu na jamii zetu tuyapuuze mambo ya mitandaoni na vijiweni yaliyojaa uchochezi na chuki,Serikali kupitia viongozi wake kuanzia ngazi ya Kata hadi Taifa kwa kushirikiana na Chama tukiwemo na sisi wawakilishi wenu tupo kazini"amesema Sagini.